IGISHANGA CYA NYABUGOGO KIRI MU BISHANGA BYASHOWEMO MILIYALI ZISAGA 40 FRW KUGIRA NGO GITUNGANYWE

Mu mirimo iri gukorerwa muri iki gishanga harimo gutunganya inzira z’amazi, kubaka imiyoboro iyobora amazi ndetse no gukora ibiyaga bihimbano bizafasha kwakira no kubika amazi menshi aturuka mu misozi ikikije aka gace. Ibi biyaga bihimbano biteganyijwe kuzagira uruhare runini mu kugabanya amazi menshi yakundaga gutera imyuzure, cyane cyane mu gihe cy’imvura nyinshi, bityo bikarinda ibikorwa remezo n’inyubako ziri muri aka gace kangana n’igice cy’ingenzi cy’ubucuruzi n’ubwikorezi mu mujyi.

Uretse kurwanya imyuzure, uyu mushinga unashyira imbere kurengera urusobe rw’ibinyabuzima ruboneka muri iki gishanga. Mu bikorwa biri gukorwa harimo gusigasira ibimera n’ibinyabuzima byihariye biboneka mu bishanga, ndetse no gutegura uburyo bwo gutunganya ahantu hashobora kuba indiri y’inyoni n’ibindi binyabuzima. Ibi bigamije gutuma igishanga cya Nyabugogo Wetland kitaba gusa igisubizo ku kibazo cy’imyuzure, ahubwo kikaba n’ahantu hafasha mu kubungabunga ibidukikije no guteza imbere ubukerarugendo bushingiye ku bidukikije.

Abayobozi b’Umujyi wa Kigali afatanyije n'ikigo cy'igihugu gishunzwe ibidukikije REMA bagaragaza ko gutunganya iki gishanga biri mu murongo w’ingamba zo kubaka umujyi utekanye ku bidukikije kandi ushobora guhangana n’ingaruka z’imihindagurikire y’ibihe, Bagaragaza kandi ko uko imirimo igenda irushaho kugera kure, ari nako icyizere cyo gukemura ibibazo by’imyuzure mu gace ka Nyabugogo kirushaho kwiyongera.

Biteganyijwe ko uyu mushinga nurangira, igishanga cya Nyabugogo kizaba cyarahindutse ahantu hatunganijwe neza, hafasha mu micungire myiza y’amazi, mu kurengera urusobe rw’ibinyabuzima ndetse no guteza imbere isura rusange y’umujyi wa Kigali. Abaturage n’abakora ibikorwa by’ubucuruzi muri aka gace bakomeje kugaragaza ko biteze inyungu nyinshi kuri uyu mushinga, cyane cyane mu kurushaho kunoza ibikorwa by’ubwikorezi n’ubucuruzi bikorerwa muri Nyabugogo.