IMIYOBORERE MIBI Y'AMAZI INTANDARO YO GUSENYUKA KW'INKUTA ZIFATA UBUTAKA

Iyo amazi y’imvura cyangwa ava mu butaka atateguriwe inzira yo gusohoka, yikusanyiriza inyuma y’urukuta. Uko agenda yiyongera, ni nako atera umuvuduko mwinshi usunika urukuta. Uwo muvuduko ushobora gutuma urukuta rutangira kugaragaza ibimenyetso byo gusaduka, gucikamo ibice cyangwa no kugwa burundu.

Kenshi usanga abantu batungurwa n’isenyuka ry’urukuta, nyamara ikibazo kiba cyaratangiye kera buhoro buhoro bitewe n’amazi atayobowe neza.

Abahanga mu bwubatsi bagaragaza ko amazi ari umwanzi ukomeye w’inkuta zifata ubutaka iyo atitabiriwe mu igenamigambi.

Amazi yinjira mu butaka agabanya imbaraga zabwo, bigatuma butakaza ubushobozi bwo gufata, bikaba byateza inkangu cyangwa kunyerera kw’ubutaka. Ibi bikunze kugaragara cyane mu bihe by’imvura nyinshi, aho inkuta zubatswe zitita ku isesengura ry’ubutaka (soil investigation) cyangwa ku igenamigambi rya drainage zihura n’ibibazo bikomeye.

Mu rwego rwo kwirinda ibi byago, abashinzwe imishinga bagomba gutekereza kuri drainage ihagije. Ibi birimo gushyiramo imyobo mito isohora amazi (weep holes), gukoresha amabuye y’urusenda inyuma y’urukuta afasha amazi kunyura, gushyiramo imiyoboro iyobora amazi kure y’urukuta, no gukoresha uburyo bwo gukingira amazi aho bikenewe. Ibi byose bifasha kugabanya umuvuduko w’amazi no kurinda urukuta gusaduka.

Kubaka retaining wall si ugushyiraho beto gusa; ni igikorwa gisaba ubumenyi, igenamigambi n’igenzura rihoraho. Iyo drainage ititaweho, urukuta rushobora kumara igihe rugaragara nk’uruhamye ariko mu by’ukuri ruri mu kaga. Ni yo mpamvu imiyoborere mibi y’amazi ifatwa nk’icyago cyihishe gishobora guteza igihombo kinini ndetse no gushyira ubuzima bw’abantu mu kaga.

Mu gusoza, inzego zishinzwe igenzura ry’imishinga n’abubatsi bakwiye gushyira imbaraga mu igenamigambi rya drainage mbere yo gutangira kubaka. Kurinda amazi kwangiza inkuta ni ukwirinda igihombo cy’ejo hazaza no kubaka ibikorwaremezo birambye kandi bitekanye.