GUTUNGANYA IGISHANGA CYA RWANDEX INTAMBWE IKOMEY MU ITERAMBERE RYO KUBUNGABUNGA IBUDUKIKIJE N'ISUKU MU MUJYI WA KIGALI

Mu myaka yashize, iki gishanga cyari kigizwe n’ahantu hatunganyijwe gake, amazi agahora ahagaze ndetse hari n’ibice byajugunywagamo imyanda. Ibi byatumaga igishanga kidatanga umusaruro mu rwego rw’ibidukikije kandi kikagira ingaruka ku isuku y’umujyi,Kubera iyo mpamvu, ubuyobozi bw’Umujyi wa Kigali bwatangiye gahunda yo kugitunganya mu buryo bugezweho kugira ngo kigire uruhare mu gusukura umujyi no kurushaho kurengera ibidukikije.

Muri uyu mushinga, harimo ibikorwa bitandukanye bigamije guhindura igishanga cya Rwandex ahantu nyaburanga hifashishwa mu kunoza ubuzima bw’abaturage. Mu bikorwa biri gukorwa harimo kubaka ibiyaga bihimbano bizafasha mu kubika amazi no kuyayobora neza mu gihe cy’imvura nyinshi. Ibi biyaga bizafasha kugabanya amazi y’imyuzure ashobora kwangiza ibice bimwe by’umujyi, bityo bigire uruhare mu kubungabunga ibidukikije no kunoza imicungire y’amazi mu mujyi.

Uretse ibiyaga bihimbano, hari no kubakwa utuyira twihariye tw’abanyamaguru n’abakunda siporo. Utu tuyira tuzafasha abaturage kubona aho bashobora gutemberera bishimira ibidukikije, Biteganyijwe ko aha hantu hazaba heza ku buryo hazajya hasurwa n’abaturage benshi ndetse n’abakerarugendo bashaka ahantu ho kuruhukira mu mujyi.

Uyu mushinga kandi uzajyana no gutera ibiti n’ibindi bimera bizafasha kurushaho kunoza umwuka mwiza mu Mujyi wa Kigali. Abashakashatsi mu bijyanye n’ibidukikije bagaragaza ko ahantu h’icyatsi n’amazi mu mijyi bigira uruhare runini mu kugabanya ubushyuhe bw’umujyi, kunoza umwuka abantu bahumeka no kongera ubwiza bw’ahantu hatuwe.

Imibare itangwa n’inzego z’iterambere ry’imijyi igaragaza ko imishinga nk’iyi ishobora gufasha mu kugabanya imyanda n’amazi mabi yinjira mu bishanga, bityo bikarinda kwangiza ibidukikije.

Nanone kandi, imishinga yo gutunganya ibishanga mu mijyi ifasha mu kongera ahantu rusange abaturage bashobora gukoreramo ibikorwa bitandukanye birimo imyidagaduro, siporo ndetse n’ubukerarugendo bwo mu mijyi.

Ku baturage batuye mu bice bikikije igishanga cya Rwandex, uyu mushinga ugaragara nk’intambwe ikomeye izafasha mu kunoza imibereho yabo.

Usibye kongera ubwiza bw’ahantu batuye, biteganyijwe ko uzanazamura agaciro k’imitungo iri muri ako gace ndetse ugafasha mu guteza imbere ibikorwa by’ubucuruzi bijyanye n’ubukerarugendo n’imyidagaduro.

Mu gihe ibikorwa byo gutunganya iki gishanga bikomeje, abashinzwe uyu mushinga bavuga ko intego ari uguhindura igishanga cya Rwandex kimwe mu bice by’ingenzi by’icyatsi biboneka mu Mujyi wa Kigali, Ibi bizafasha mu gukomeza kubaka umujyi usukuye, ufite ibidukikije bibungabunzwe kandi utanga amahirwe ku baturage yo kubona ahantu heza ho kuruhukira no kwidagadurira. Uyu mushinga ugaragaza ko iterambere ry’imijyi rishobora kujyana no kurengera ibidukikije, bigatanga icyizere ko mu myaka iri imbere Umujyi wa Kigali uzakomeza kuba umwe mu mijyi itanga urugero rwiza mu micungire y’ibidukikije muri Afurika.