ESE UMUSHINGA WO KUVUGURURA GARE YA NYABUGOGO UGEZEHE

Uyu mushinga waganiriweho mu Nteko Ishinga Amategeko, aho abagize Komisi y’Ingengo y’Imari n’Umutungo ya Leta bagaragaje ko hakenewe ubuvugizi ku bijyanye n’ingengo y’imari izakoreshwa mu kuwushyira mu bikorwa. Biteganyijwe ko amafaranga azifashishwa azaturuka ku bufatanye hagati ya Minisiteri y’Imari n’Igenamigambi MINICOFIN hamwe na Banki y’Isi, hagamijwe kubona ubushobozi bwo kuwutangira no kuwusoza neza.

Amakuru atangwa n’Umujyi wa Kigali agaragaza ko imirimo yo kubaka iyi gare nshya yari iteganijwe gutangira mu mwaka wa 2025, ikazarangira mu mwaka wa 2027. Ariko kubera kudindira mu gusinya amasezerano hagati ya MINCOFIN na Banki y'Isi byatumye uyu mushinga utihuta Aho biteganijwe ko mugihe Aya masezerano yasinywa muri mutarama 2026 Uyu mushinga wo Kubaka gare wazatangira umwaka utaha wa 2027.

Iyi gahunda ni imwe mu mishinga minini igamije kuvugurura uburyo bw’ubwikorezi mu Mujyi wa Kigali, cyane cyane mu duce twakira abagenzi benshi buri munsi.

Abadepite bagize Komisi y’Ingengo y’Imari n’Umutungo bya Leta bagaragaje ko nubwo umushinga ari ingenzi, hakiri impamvu zituma utaratangira gushyirwa mu bikorwa vuba. Bagaragaje ko hakenewe kwihutisha ibiganiro n’abafatanyabikorwa kugira ngo ingengo y’imari iboneke vuba, bityo ibikorwa byo kubaka gare nshya ya Nyabugogo bitangire.

Biteganyijwe ko iyi gare izubakwa mu buryo bugezweho, igafasha kunoza urujya n’uruza rw’abagenzi n’ibinyabiziga biva mu bice bitandukanye by’igihugu ndetse n’ibijya mu bihugu by’amahanga.

Uretse kwakira abagenzi benshi mu buryo bworoshye, iyi nyubako izafasha no kugabanya umubyigano w’imodoka n’abagenzi usanzwe ugaragara mu gace ka Nyabugogo, bityo igire uruhare mu iterambere ry’imijyi n’ikorwa ry’ibikorwaremezo bigezweho mu Rwanda.